Línuskipið, sum er keypt úr Noregi, kemur í flotan síðst í oktober.

Felagið  M&S Strendur hevur keypt norska frystilínuskipið Østerfjord. Skipið skal avloysa Kamb, sum felagið hevur selt til Vestmanna.

Tað skivar Føroyska Sjómansmissiónin á facebook.

Østerfjord er bygdur í 1998. Hann er 46 metrar langur og 11 metrar breiður, og tekur 320 tons.

Skipið hevur dragibrunn, sum merkir, at teir draga línuna upp gjøgnum skipið.

Frammanundan er tað bara eitt línuskip í landinum, sum hevur dragibrunn, og tað er Klakkur, sum eisini er keyptur úr Noregi. Klakkur kom til Føroya 9. januar.

Tað eru fleiri fyrimunir við dragibrunni, og Klakkur hevur fiskað væl, síðani hann kom í flotan.

Í góðum standi

Mortan Mortensen, skipari á Kambi, sum eisini eigur í felagnum M&S Strendur, sigur við facebooksíðuna hjá Føroysku Sjómansmissiónini, at Østerfjord er í góðum standi, men at nakrar fáar umvælingar skulu gerast, áðrenn skipið fer til fiskiskap.

Nýggi Kambur kemur til Føroya síðst í oktober.

Hóast nýggja skipið er 22 ára gamalt, er tað 11 ár yngri enn verandi Kambur.

Sjóvar kommuna ynskir eigarunum góða eydnu við nýggja skipinum.

kelda: www.kvf.fo