Allir borgarar í Sjóvar kommunu fáa nú møguleikan at velta eitt leigað lendi.

Sjóvar kommuna eigur nakað av óbrúktum lendi, og ætlanin er, at partur av hesum lendi, skal kunna gagna borgarunum í kommununi. Talan er um økið við Lághálsar á Strondum, úti móti Raktanga.

 Kommunan bjóðar tvær ymiskar støddir av leiguøkjum:

·         10 fermetrar fyri kr. 100 um árið

·         50 fermetrar fyri kr. 300 um árið

Hugsanin er, at størru leiguøkini hóska væl til eplaveltu, meðan minnu økini hóska væl til veltu av øðrum slagi, t.d. til grønmeti.

Sjóvar kommuna slær og burturbeinur deyðagrasið á leiguøkjunum fyrst í næstu viku (viku 19), og síðani fær leigarin atgongd til økið.

Ein velta kann leigast fyri hvørt húski.

Um tú ynskir at leiga eitt øki, ber til at tilmelda seg á hesi leinkju. Til ber eisini at tilmelda seg við at ringja á telefon 232725.

Í samband við at kommunan bjóðar út leiguøki, verður skipað fyri einum íblástrar-tiltakið hóskvøldið 8. mai kl. 18.30, har fólk koma at greiða frá ymiskum møguleikum og royndum við epla- og grønmetisveltum. Íblástrar-tiltakið er ikki bert ætlað teimum sum leiga eitt øki, men øllum áhugaðum í veltu av ymiskum slag.

Á tiltakinum luttaka Gunnar Bjarnason, landbúnaðarfrøðingur, og okkara egna Eva Andersen, sum er persónurin aftanfyri facebook-bólkin "Urtagarðurin hjá Evu á Strondum". Bæði tvey hava drúgvar royndir við veltum og vøkstri av ymiskum slag, og koma tey at greiða frá ymiskum, heilt frá hvussu ein í smáum byrjar at velta, til meira alternativar loysnir og møguleikar við veltum.

Ein kaffimuður verður eisini at fáa, og møguleiki verður at seta spurningar. 

Sjóvar kommuna ynskir at øll, roynd sum óroynd, skulu hava møguleikan at velta, og tí fara vit at skipa fyri einum degi, har fólk, sum eru von at velta, eru á staðnum og læra frá sær.