Tíðindi
Kjartan flytur til svenskan hondbólt
Kjartan Johansen skiftir frá norskum til svenskan hondbólt og skal næsta kappingarár umboða Önnered HK í bestu svensku hondbóltskappingini. Tað skrivar svenska tíðindasíðan handbollskanalen í dag.
- Tá eg fekk fyrispurningin frá Önnered, kendi eg á mær, at mær tørvaði nýggjar avbjóðingar. Eg vóni við hesum framhaldandi at kunna menna meg sum hondbóltsspælari, samstundis sum eg kann hjálpa nýggja felagnum fram á leið, sigur Kjartan Johansen við heimasíðuna.
Kjartan Johansen er 25 ára gamal og hevur seinastu árini leikt við Viking Stavanger í norsku kappingini. Seinastu árini hevur Kjartan ment seg til at verða ein av fremstu hondbóltsleikarunum í Føroyum.
- Við Kjartani hava vit funnið ein spennandi ungan leikara, sum hóast sín unga aldur, hevur drúgvar royndir, bæð í bestu norsku deildini og eisini sum landssliðsleikari fyri Føroyar, sum í løtuni kappast við Russland, Ukreina og Kekkia, sigur stjórin í svenska felagnum, Johan Sylwan.
Vit ynskja Kjartani bestu eydnu við nýggju avbjóðingini í Svøríki.