Í gjár byrjaði TeenStreet á Strondum og hava 27 tannáringar teknað seg til leguna, sum endar leygarkvøldið á midnátt. Høvuðsevnið fyri leguna er “Forvitin”. Tá vit eru forvitin, eru vit spent at læra og vita okkurt. Ein góður máti at gera hetta, er at spyrja spurningar. Í evangeliunum spyr Jesus fleiri enn 300 spurningar. Í bíbliutímunum verður hugt at nøkrum spurningum, sum Jesus spurdi.

Almenn tiltøk

Umframt bíbliutímarnar er eisini nógv annað á skránni hesar dagar – eisini almenn tiltøk. Mikudagin klokkan 13 verður stuðulsrenning á vøllinum við bygdahúsið, har øll eru vælkomin bæði at renna, stuðla og heppa. Innkomni peningurin fer til tvær ymiskar verkætlanir: fátøk børn í Ukraina og at byrja TeenStreet í Afrika. Mikukvøldið klokkan 20.30 verður bál og almenn sangløta á niðara økinum í skúlagarðinum. Fríggjakvøldið klokkan 20.30 verða ymisk spøl á vøllinum og í bygdahúsinum fyri øllum. Verið hjartaliga vælkomin til hesi trý tiltøkini, tí vit gleða okkum at síggja tykkum :)

Fyrireikararnir