Tíðindi
Ruddingardagurin 2020 í myndum
Í gjár var árligi ruddingardagurin aftur á skránni.
Ruddað varð í allari Sjóvar kommunu, heilt av Selatrað til Innan Glyvur.
Aftur í ár tóku okkara borgarar sera væl undir við hesum degi, og tað eru vit sera takksom fyri.
Ruddingardagurin hevur fleiri góðar síður, tí umframt umhvørvisligu ávirkanina, er hetta ein dagur, har vit eru úti og flyta okkum, samstundis sum samanhald og trivnaður eisini seta sín dám á dagin.
Sum vanligt varð byrjað við morgunmati á Selatrað, Strondum og Innan Glyvur. Síðani fóru fólk í hvør sítt heraðshorn at rudda, og dagurin endaði við, at kommunan bjóðaði øllum til ein góðan døgurabita í bygdahúsinum.
Samanumtikið kann sigast, at hetta var ein frálíkur dagur, sum eydnaðist sera væl, hóast eitt sindur kalt var í veðrinum.
Óruddið í kommununi er minkað sera nógv, síðani ruddingardagar eru settir á breddan. Sostatt er hetta eitt gott og burðardygt átak fyri kommununa og fólkið, ið her býr. Eisini bendir nakað á, at í samband við fokusið á at rudda og á at verja nátturuna sum heild er ein hugsburðsbroyting farin fram í samband við at tveita burturkast í náttúruna.
Sjóvar kommuna takkar enn einaferð øllum fyri hjálpsemi í samband við dagin.
Myndir av ruddingardegnum síggjast niðanfyri.